آصف جیلانی
امریکا کے صدارتی انتخاب میں ، ریپبلیکن پارٹی کے ڈانلڈ ٹرمپ کی ،فتح کے تین ہفتوں کے بعد ، پاکستان کے وزیر اعظم میاں نواز شریف نے بدھ کے روز اچانک منتخب صدر کو ٹیلیفون کر کے ان کی فتح پر مبارک باد پیش کی ہے۔ بین الاقوامی میڈیا نے اس بات پر سخت تعجب کا اظہار کیا ہے کہ پاکستان کی وزارت اطلاعات نے ٹرمپ اور پاکستانی وزیر اعظم کے درمیان ٹیلیفون پر بات چیت کی لفظ بہ لفظ تفصیل شائع کی ہے ۔ عام طور پر اس عمل کی روایت نہیں ۔
ڈانلڈ ٹرمپ نے کبھی میاں نواز شریف سے ملاقات نہیں کی لیکن حکومت پاکستان کی پریس ریلیز میں کہاگیا ہے کہ ’’ صدر ٹرمپ نے کہا ، وزیر اعظم نواز شریف آپ بڑی شہرت کے مالک ہیں۔ آپ بہتریں شخص ہیں ۔ آپ حیرت انگیز کام کر رہے ہیں ، جو ہر طرح سے عیاں ہے۔‘‘ ڈانلڈ ٹرمپ کبھی پاکستان نہیں گئے لیکن انہوں نے نواز شریف سے کہا کہ آپ کا ملک لاجواب ہے جو بے حد مواقعوں سے مالا مال ہے۔ ان کا کہنا تھا کہ پاکستانی بے حد ذہیں افراد ہیں۔غالباً ٹرمپ کو اس کا علم نہیں کہ پاکستان میں اکثریت مسلمانوں کی ہے جن پر انہوں نے انتخابی مہم کے دوران ، اعلان کیا تھا کہ وہ مسلمانوں کی امریکا میں آمد پر پابندی عاید کر دیں گے ، خاص طور پر ان ملکوں کے مسلمانوں پر جو اسلامی دہشت گردوں کے گڑھ ہیں اور ان ملکوں میں ، ٹرمپ کے دعوی کے مطابق پاکستان بھی شامل ہے۔
میاں نواز شریف سے ٹیلی فون پر گفتگو میں وعدہ کیا کہ میں متنازعہ مسائل کے حل تلاش کرنے کے لئے ہر رول ادا کرنے کے لئے ، جو آپ چاہتے ہیں ، میں ادا کرنے کے لئے تیارہیں۔ گو انہوں نے مسلہ کشمیر کا ذکر نہیں کیا لیکن غالبا ان کا اسی طرف اشارہ تھا، لیکن وہ بخوبی جانتے ہیں کہ ہندوستان کبھی بھی اس مسئلہ پر مصالحت یا ثالثی کے لئے تیار نہیں ہوگا اور ان کی پیش کش کویکسر ٹھکرا دے گا۔
انتخابی مہم کے دوران ، پاکستان کے بارے میں ، ٹرمپ کا رویہ ایک معمہ رہا ہے ۔انہوں نے پاکستان کا اس انداز کا تعریفی ذکر نہیں کیا جیسا کہ میاں نواز شریف سے ٹیلی فون پر گفتگو میں کیا۔ جب بھی انہوں نے پاکستان کا ذکر کیا ، ہندوستان کے تناظر میں کیا جیسے کہ ایک بار ٹرمپ نے کہا کہ ’’ پاکستان کو ہندوستان کے ذریعہ روکا جا سکتا ہے ۔ اور آپ کو ہندوستان سے معاملات کرنے ہوں۔ اس سال17 جنوری کو ٹرمپ نے اپنے ایک مضمون میں لکھا تھا کہ ’’ یہ بات سمجھ لیجیے کہ پاکستان ہمارا دوست نہیں ہے ۔ ہم نے اسے اربوں ڈالر امداد میں دیے ہیں ۔ اس کے جواب میں ہمیں کیا ملا؟ سوائے غداری اور بے عزتی کے‘‘۔
امریکا میں عام طور پر یہ سمجھا جاتا ہے کہ اس کے نزدیک پاکستان کی اہمیت ، افغانستان میں امن کے قیام کے نقطہ نگاہ سے ہے۔ لیکن حیرت انگیز بات یہ کہ انتخابی مہم کے دوران ، ٹرمپ اور ان کی مد مقابل ہلری کلنٹن نے افغانستان کا کوئی ذکر نہیں کیا ، جہاں گذشتہ پندرہ سال سے امریکا جنگ میں الجھا ہوا ہے ۔ جس میں امریکا کے 3559فوجی اور فوج سے متعلق امریکی شہری ہلاک ہو چکے ہیں اور جنگ پر بیس کھرب ڈالر خرچ ہو چکے ہیں۔ اس وقت افغانستان میں امریکا کی سات ہزار فوج تعینات ہے اور اس کے علاوہ امریکا کے چھ ہزار خصوصی فوج کے دستے بر سر پیکار ہیں۔
ٹرمپ نے ایک انٹرویو میں کہا تھا کہ افغانستان میں امریکی فوج کو برقرار رکھنے کی ایک بڑی وجہ ، پاکستان کا جوہری اسلحہ ہے۔گو اس کی انہوں نے وضاحت نہیں کی لیکن عام خیال یہی ہے کہ ان کا اشارہ اس اندیشہ کی طرف تھا کہ پاکستان کا جوہری اسلحہ جہادیوں کے ہاتھوں میں جا سکتا ہے۔ اس سلسلہ میں ٹرمپ کہہ چکے ہیں کہ پاکستان کو جوہری اسلحہ جہادیوں کے ہاتھوں میں جانے سے روکنے کے لئے ہم ہندوستان کی مدد چاہیں گے۔ انتخابی مہم کے دوران ، فوکس نیوز پر ایک انٹرویو میں ٹرمپ نے دعوی کیا تھا کہ وہ دو منٹ کے اندر اندر ایبٹ آباد میں اسامہ بن لادن کا سراغ لگانے والے ، شکیل آفریدی کو جیل سے آزاد کرا سکتے ہیں۔
انتخابی مہم کے دوران ٹرمپ نے امریکا کے ہندوستانیوں کے ووٹ حاصل کرنے کے لئے کہا تھا ’’ ٹرمپ کی صدارت کے دور میں ، ہندوستان اور امریکا بہترین دوست ہوں گے ۔ ہندوستان سے زیادہ اور کسی سے تعلقات ہمارے لئے اہم نہیں ہوں گے ۔‘‘ انتخابی فتح کے بعد اپنی کابینہ کے انتخاب میں ٹرمپ کا ہندوستان کی طرف جھکاو نمایاں ہے۔ انہوں نے ایک ہندوستانی نژاد خاتون۔ ساوتھ کیرولاینا کی گورنر ، نکی ہیلی کو اقوام متحدہ میں امریکا کی مندوب مقرر کیا ہے اور ایک اور ہندوستانی نژاد خاتون ، سیما ورما کو میڈی کیر کا سربراہ نامزد کیا ہے۔
اس میں شک نہیں کہ تاریخی اعتبارسے ریپبلیکن پارٹی کے پاکستان کے ساتھ قریبی تعلقات رہے ہیں۔خاص طور پر اس زمانے میں جب افغانستان میں سوویت یونین کے خلاف جہاد میں پاکستان بڑھ چڑھ کے حصہ لے رہا تھا اور امریکا اپنے سیاسی اور فوجی مقاصد کے لئے بھر پور مالی اور فوجی امداد فراہم کر رہا تھا۔ لیکن 9/11کے بعد افغانستان میں طالبان کے خلاف امریکا کی جنگ میں ، طالع آزما جنرل مشرف کی طرف سے پاکستان کو دھکیلنے کے فیصلہ کے باوجود ، ریپبلیکن پارٹی کی انتظامیہ اور پاکستان کے درمیان کشیدگی کا دور شروع ہوا۔ مشرف نے امریکی مداخلت اور مطالبات کا ایسا دروازہ کھول دیا تھا کہ امریکی یہ سمجھنے لگے تھے کہ پاکستان کو جو حکم دیا جائے اس پر فوری عمل لازمی ہے۔
ایک طرف امریکیوں کو ڈرون حملوں کی کھلی آزادی تھی اور دوسری جانب پاکستان پر سخت دباو تھا کہ وزیرستان میں حقانی گروپ کو قلع قمع کرنے کے لئے بھر پور فوجی کاروائی کی جائے۔ امریکی مطالبات کا ایک پہاڑ تھا جو کھڑا ہو گیا۔
بلا شبہ ، میاں نواز شریف کے ساتھ ٹیلی فون پر ٹرمپ کی تعریف و توصیف بھری گفتگو نہایت شیریں تھی ، اور ممکن ہے نواز شریف سمیت پاکستان کے بہت سے لوگو ں کو امید ہوگی کہ ٹرمپ کے دور میں امریکا کے ساتھ پاکستان کی تمام تر کشیدگیاں دور ہو جائیں گی لیکن صحیح حقیقت تو اسی وقت اجاگر ہوگی جب ۲۰ جنوری کو ٹرمپ مسند صدارت سنبھالیں گے اور دیکھنا یہ ہوگا کہ ہندوستان کے ساتھ بقول ان کے اہم ترین تعلقات کے وعدوں کو وہ کیسے عملی جامہ پہنائیں گے، پاکستان کے جوہری پروگرام کے خلاف امریکا کی خواہشات اور ہندوستان کے عزائم کے حصول کے سلسلہ میں کیا حکمت عملی اختیار کریں گے اور پاکستان کو دہشت گرد ملک قرار دینے کے لئے ہندوستان کی سر توڑ کوششوں میں کس حد تک اعانت کرتے ہیں۔ اُس وقت پاکستان میں لوگ پوچھیں گے’’میاں صاحب آپ کس کو دعوت دے رہے تھے ؟
♦
